النفسية مع د. محمد طه: مش عايزة بيتى يتخرب - محمد طه - بوابة الشروق
الجمعة 26 فبراير 2021 9:51 ص القاهرة القاهرة 24°

احدث مقالات الكاتب

شارك برأيك

بعد السماح بعدم حضور الطلاب في المدارس.. كولي أمر:

النفسية مع د. محمد طه: مش عايزة بيتى يتخرب

نشر فى : السبت 26 ديسمبر 2020 - 7:40 م | آخر تحديث : السبت 26 ديسمبر 2020 - 7:40 م

فى هذا الباب الأسبوعى الذى يظهر كل يوم احد، يتواصل د. محمد طه أستاذ م. الطب النفسى، معكم، للإجابة على أسئلتكم واستفساراتكم فى كل ما يخص أحوال النفس، والطب النفسى، والعلاقات الإنسانية.

راسلونا على: http://m.me/mohamedtaha.net

●● كل الرسائل تخضع للسرية والخصوصية التامة، والإجابات عليها تكون بطلب المُرسل وبدون ذكر أية معلومات شخصية.

ــ أنا بقالى سنة.. متجوزة فى بيت عيله بس ليا شقه منفصله. بعد ما اتجوزت بشهرين جوزى بقى يضربنى، على الرغم من اننا واخدين بعض عن حب، اتحول تماما بعد الجواز، بيضرب ضرب عنيف.. أنا دلوقت سايبة البيت.. بس أنا مش عايزه بيتى يتخرب.. أعمل إيه؟ مش عارفة! مصدومة..

ــ أختى العزيزة..
سؤالك مهم.. والصراع اللى حاصل جواكى أهم.. علشان كده أنا هاجاوبك اجابتين.. إجابة الطبيب النفسى.. بموضوعية ومهنية قدر المستطاع.. وإجابة تانية غير موضوعية وغير مهنية.. نابعة من بنى آدم.. أب..
كطبيب نفسى، هاقولك إنى متفهم جدا صدمتك وألمك.. وإنى مقدر رغبتك فى الحفاظ على علاقتك بزوجك بالرغم مما حدث، واللى ممكن يكون سببه مشكلة فى إدارة الغضب Anger Management عند زوجك، وإنى أنصحكم تتوجهوا أولا لمعالج نفسى يساعده فى تقويم هذا السلوك المرضى.. وثانيا لمعالج زواجى Couple Therapist يساعدكم فى التعامل مع هذا الوضع الصعب.. ومحاولة حله أو تجاوزه بالطريقة المناسبة ليكم انتم الاتنين، ومش على حساب حد فيكم انتم الاتنين.

دى إجابة الطبيب النفسى فى عيادته.. على إحدى حالاته/عميلاته..

لكن هذه الصفحة مش عيادة.. وحضرتك مش حالة أو عميلة.. وعرفتينى ــ غالبا ــ عن طريق كتبى ومقالاتى.. ومن هنا تيجى إجابتى التانية.. الغير موضوعية والغير مهنية..

انتى مش عاوزة تخربى بيتك.. مش كده؟
طيب.. أنا عاوز أقولك إن بيتك اتخرب بالفعل فى اللحظة اللى جوزك فكر فيها انه يمد إيده عليكى..
انتى واخدة جوزك عن حب.. صح؟
أقولك كمان إن كلمة (حب) وكلمة (ضرب) ماينفعوش يجتمعوا فى علاقة واحدة.. ولا بيت واحد.. ولا حتى جملة واحدة..

أكتر حاجة بتصدمنى وتؤلمنى وتخلينى واقف مذهول ومش فاهم، هى إن الراجل يصبح مراته بعلقة ويمسيها بإهانة.. وهى تقول: «مش عاوزة أخرب البيت».. يؤذيها ويبهدلها ويطلع عينيها، وهى تقول: «مارضيتش أقول لأهلى علشان ماكبرش الموضوع».. يكفر سيئاتها ويحرمها من انسانيتها، وهى تقول: «أنا صابرة عليه يمكن يتعدل حاله»..

بيت إيه؟ وموضوع إيه؟ وحال إيه؟
ده البيت خربان.. والموضوع كبير.. والحال مايل..

وطبعا ده بيُقابل ــبكل أسفــ بتصفيق وتهليل وتشجيع من كتير من الأهل والأصدقاء والمعارف.. من عينة «دى ست حكيمة».. «دى زوجة أصيلة».. «دى امرأة صابرة»..

قبول الإهانة بقى اسمه «حكمة».. السكوت على الأذى بقى اسمه «أصالة».. واستعذاب الألم بقى اسمه «صبر»..

الضرب غير مسموح يا ستى..
فكرة الضرب غير مطروحة من أصله..
مد الإيد ده جريمة يعاقب عليها القانون..

اللى بيضرب مش طبيعى.. واللى يبرر الضرب مجرم.. واللى يشجع على الضرب تحت أى مسمى ده حد مافيش منه رجا..

من فضلك يا عزيزتى.. قولى (لأ) بكل ما تملكى من قوة.. ماتقبليش ده تانى.. ماتسمعيش أى حد يقولك اصبرى واستحملى.. واسألى نفسك سؤال بسيط جدا: هو لو كنت أنا اللى مديت ايدى عليه وضربته.. كان هايعمل إيه؟
تقدرى تطلبى تدخل أى حد من الأهل (العقلاء المنصفين) من الطرفين.. تقدرى تتخذى أى اجراء قانونى.. تقدرى تتواصلى مع المجلس القومى للمرأة فى أى وقت..
واطلبى ــلو قررتى تكملى معاهــ انه يعتذر ويتعهد قولا وكتابة قدام شهود ان ده لا يتكرر تانى تحت أى مسمى ووتحت أى ظروف ولأى سبب..

تانى.. ضرب لأ.. إهانة لأ.. قلة احترام لأ..
ده مش حب.. ولا جواز.. ولا علاقة انسانية من أصله..

ماتتنازليش عن حقك فى الاحترام باسم الحب..
ولا عن حقك فى التقدير وحسن المعاملة باسم العِشرة..
ولا عن حقك فى حياة زوجية كريمة باسم «الحفاظ على البيت»..

كلامى صادم؟
غريب فى وسط اللى بتسمعيه من اللى حواليكى؟
مش معتاد فى بعض العائلات والمجتمعات والثقافات؟
معلهش.. ماهو بعض العائلات والمجتمعات الثقافات بتحتاج من وقت للتانى تدخل علاجى حاد زى الصدمات الكهربائية.. علشان تنتنبه وتفوق وتعيد النظر..

بافكرك.. كلامى ده مش موضوعى.. وماينفعش أقوله بصفتى المهنية..
لكنى.. وبكل تأكيد.. هأقوله لبنتى.. قبل ما تتجوز..

ربنا يحفظكم جميعا

محمد طه أستاذ مساعد الطب النفسي بكلية طب المنيا
التعليقات