النفسية.. مع د. محمد طه | أنا والموسيقى - محمد طه - بوابة الشروق
الأحد 17 أكتوبر 2021 10:29 م القاهرة القاهرة 24°

احدث مقالات الكاتب

شارك برأيك

هل تؤيد مقترح التبرع بالأعضاء بعد الوفاة؟

النفسية.. مع د. محمد طه | أنا والموسيقى

نشر فى : السبت 10 أكتوبر 2020 - 8:45 م | آخر تحديث : السبت 10 أكتوبر 2020 - 8:45 م

فى هذا الباب الأسبوعى الذى يظهر كل يوم احد، يتواصل د. محمد طه أستاذ م. الطب النفسى، معكم، للإجابة على أسئلتكم واستفساراتكم فى كل ما يخص أحوال النفس، والطب النفسى، والعلاقات الإنسانية.

راسلونا على: http://m.me/mohamedtaha.net

●● كل الرسائل تخضع للسرية والخصوصية التامة، والإجابات عليها تكون بطلب المُرسل وبدون ذكر أية معلومات شخصية.

مش عارفة إذا كان حضرتك هتقدر تفيدنى فى ده أو لأ.. بس حقيقى كتب حضرتك من كتر ما أثرت فيا أتمنى نصيحة..
من غير ما أطول.. أنا بحب المزيكا جدا.. حرفيا هى حياتى ومش بعرف أعمل حاجة غيرها، ومش شايفه لنفسى أى كارير تانى بعيد عنها. بس فكرة إن فى علماء قالوا حرام وإنها ممكن تكون شبهة ده موقفنى جامد. أنا قريبة من ربنا الحمد لله، ومش عايزة أبقى بعمل معصية.
بجد أنا مش عارفة أعمل إيه فعلا.. لا عارفة آخد خطوة جد فيها، ولا أشوف كارير تانى، وخايفة أظلم نفسى بإنى أسيب موهبتى دى، وخايفة أكمل ويبقى كله غلط ويبقا مكسبى ورزقى من حرام.
الموضوع ده هلكنى حرفيا. أتمنى حضرتك تقدر تفهمنى، أمشى ورا كلام العلماء والمشايخ، واللا ورا دماغى واللى قلبى مرتاحله.


ــ عزيزتى..
أنا طبعا مش عالم دين، وليس لى أن أفتى فيما ليس لى به علم.. لكنى هاجاوبك فى حدود معرفتى وحدود تخصصى.. وهاضع نفسى مكانك..
الدين يا عزيزتى ــ أى دين ــ بيهتم جدا بتنمية الإحساس الجمالى للإنسان، وبيسعى دائما للارتفاع بذوقه، والرقى بملكاته وطاقاته النفسية والروحية والعقلية. والفنون بأنواعها بتساعد على ارتقاء سلم السمو النفسى بأكثر من طريقة.
علماء الدين اختلفوا فى حكم الموسيقى.. وهذا الاختلاف زى ما بيقولوا (رحمة).. لأنه بيديكى مساحة تبحثى وتقارنى وتختارى اللى يرتاح لى قلبك.. إلى جانب إن حكم التحريم بكل تأكيد لا ينطبق على كل أنواع وأشكال (وأغراض) الموسيقى، لكنه ــ على حد علمى ــ يسرى على الموسيقى اللى بتنحدر بنفس صاحبها، وتؤذى روحه، وتخاطب شهواته المحرمة.. أنصحك بقراءة ما كتبه الإمام أبوحامد الغزالى فى هذا الشأن..
خلينى دلوقت أقولك الفوائد النفسية للموسيقى.. كما خلصت إليها الأبحاث والدراسات العلمية الحديثة:
الموسيقى بتساعد على تحسين الوظائف المعرفية (التركيز، الانتباه، الإدراك).
الموسيقى الهادية تساعد على تقليل القلق والتوتر النفسى.
الموسيقى بتساعد على تنظيم حركة الجهاز الهضمى ونجاح برامج التغذية.
الموسيقى بتحسن الذاكرة.
الموسيقى بتؤدى لتخفيف الألم (الجسدى والنفسى).
الموسيقى تساعد على النوم الجيد المُشبع.
الموسيقى بتساعد على التحفيز وزيادة الهمة والإرادة النفسية.
الموسيقى بتحسن المزاج وتساهم فى الشعور بالفرحة والسعادة.
الموسيقى تساعد فى علاج الاكتئاب.
الموسيقى بتحسن الأداء أثناء العمل.
صديقتى..
ماتتخليش عن موهبتك.. واسعى لتحقيق حلمك.. وتتبعى شغفك حتى النهاية..
واستفتى قلبك.. ولو أفتوك..
كل دعواتى بالتوفيق والنجاح

محمد طه أستاذ مساعد الطب النفسي بكلية طب المنيا
التعليقات