أصدر الشاعر والمؤلف أيمن بهجت قمر بيانا؛ ليرد على الجدل الذي أثير حول أغنية «النفسية»، التي أصدرها الفنان محمد الشرنوبي والمطرب حمزة بنفس الاسم وفي نفس التوقيت تقريبا، حيث أصدرها «حمزة» يوم الخميس الماضي من كلمات محمد القاياتي وألحان حمزة وتوزيع هاني يعقوب، بينما طرحها «الشرنوبي» يوم السبت الماضي من كلمات أيمن بهجت قمر وألحان محمد يحيى وتوزيع إلهامي دهيمة.

وكتب «قمر»، عبر صفحته الرسمية على موقع «فيسبوك»: «أنا الحمد لله مش محتاج بعد العمر ده إني اتخانق مع حد وأدخل في نزاع على أغنية، ده شيء ما حصلش معايا في بداياتي فأكيد مش المفروض إنه يحصل بعد 27 سنة تعبت فيهم وبنيت اسم وسمعة الحمد لله».

وتابع «قمر»: «أنا كتبت الأغنية دي من حوالي 3 سنين وعملناها أنا ومحمد يحيى لمحمد الشرنوبي من فترة طويلة حوالي سنة ونص وأكتر، والكلام اترخص في الرقابة باسمي في أول مارس وكل شيء كان تمام لحد ما لقيت من كام يوم مطرب شاب، والله والله عمري ما كلمته ولا أعرفه شخصيا ومش زي ما هو ماشي يقول».

وأضاف: «المهم لما لقيت الاسم والفكرة والمحتوى كله متشابه ولقيت لوجو صوت الدلتا قلت بلاش أعمل بلبلة للولد مع الشركة، كلمت ملحن شاب صاحبه أنا أعرفه وبلغته إن فيه أغنية لمحمد الشرنوبي وكده حرام، وخصوصا إن صاحبه قالي (فعلا إحنا عرفنا من وقت مهرجان الجونة إن فيه أغنية معمولة شبهها)، قلت له (طيب الأغنية دي بفكرتها متسجلة باسمي في المصنفات الفنية، يبقى الحل نعمل زي الناس المحترمين.. يا تغيروا الكلام يا نلجأ لجهة تحكم بيني وبينهم وهي جهاز الرقابة على المصنفات الفنية)».

وأكمل «قمر»: «حقيقي مهزلة وأسلوب رخيص ومافيهوش أدنى أنواع الاحترام لفرق الخبرة والسن والزمالة، وشغالين كمان حسبي الله ونعم الوكيل وآيات قرآنية ودعا علينا وكأن محمد الشرنوبي ده برضه مش مطرب في بداية حياته ومحتاج الفرصة دي، والغريبة إنهم منزلين بوست بيسخروا مني فيه وبيتكلموا بمنتهى عدم الاحترام ويبرروا إن جملة (النفسية محتاجة) دي ملك الناس ومش حكر على حد، طبعا ده كلام من واحد معندوش أي فكرة وجاهل، طب ما الكلام كله ملك الناس وأي حاجة بنكتبها الناس بتقولها وهو ده أساس نجاح الشاعر اللي بيلقط الكلمة أو اللحظة ويحولها لأغنية، ومادام اتسجلت باسمي بعنوانها وبفكرتها ومحتواها يبقى خلاص، حتى لو توارد خواطر ماينفعش غير لو هما معاهم ورق يحفظ حقهم بترخيص الكلام قبلي.. يعني أنا أألف قصة وتنزل فيلم، تيجي حضرتك تألف زيها وتقوللي ما أنا ماعرفش وتوارد خواطر والأفكار مش حكر على حد؟!».

واختتم البيان: «كفاية استهزاء بحقوق الناس.. كفاية عدم احترام لتاريخ الناس.. كفاية كل ما تتزنق تحولها لصراع أجيال مع شخص هو نفسه اللي لحد أسبوع فات بتلجأ له وقت ما بتحتاج لضهر ليك وكان أجدع واحد في الدنيا وقت ما كانت جدعنته ماشية مع مصلحتك. عموما بينّا القانون ومش علشان حاجة هاخدها من وراكوا مثلا، لكن علشان زي ما كنت واحد من اللي علموكوا إزاي تدوروا على حقوقكوا، هعلمكوا برضه إزاي ماتتعدوش على حقوق الناس، ونفسي طويل ويمهل ولا يهمل».

https://www.facebook.com/Ayman.Bahgat.Amar1974/posts/2167136343547348
بنود مترابطة - 1