قال الفنان محمد رجب، إن أزمة فيلمه الأخير «بيكيا» لم تحدث في تاريخ السينما، معقبًا: «المتعارف عليه إن المنافس اللي قدامك هو اللي يبقى ضدك، لكن اللي كان ضدي هو أحمد السبكي منتج العمل نفسه».
وأضاف خلال لقائه مع برنامج «حفلة 11»، المذاع عبر فضائية «on e»، مساء أمس الأربعاء، أن فيلمه لم يطرح في السينمات من الأساس، وإنما كان يستخدم لحجز السينمات لفيلم آخر، مشيرًا إلى فيلم «الديزل» لمحمد رمضان والذي أنتجه وأخرجه كريم السبكي.
وتابع: «غرفة صناعة السينما تعلن لأول مرة إن فيلم في العيد منزلش، أنا فيلمي منزلش، والفيلم ده أنا كنت باني عليه أحلام، مهما كان مبالغ فيها جدًا، لكن أنا كان من حقي أحلم».
وبشأن انحياز منتج فيلمه لفيلم «الديزل»، تابع: «مش بس عشان فيه محمد رمضان، لكن كان فيه ابنه منتج ومخرج، وميوله ليه أكتر، يعني لو كان فيلم محمد رمضان بيخرجه حد تاني، مكنش هيحصل معايا كده»، مضيفًا أن ما حدث تسبب في ضياع جهده طوال سنة كاملة.
فيلم «بيكيا» من بطولة محمد رجب، وآيتن عامر، وهنا الزاهد وأحمد حلاوة، وتأليف محمد سمير مبروك، وإخراج أحمد حمدي.